घोराहीका १९ वटै वडामा स्वास्थ्य परीक्षण अभियान, सिमलताराबाट सुरुआत
दाङ । घोराही उपमहानगरपालिकाका १९ वटै वडामा सञ्चालन गर्ने तयारी गरिएको विशेषज्ञ चिकित्सकसहितको बृहत् स्वास्थ्य परीक्षण अभियान घोराही–१ सिमलताराबाट सुरु भएको छ।
घोराही बनाऔँ अभियानको आयोजना तथा सञ्जीवनी टिचिङ हस्पिटलको प्राविधिक सहयोगमा असोज १८ गते आइतबार सिमलतारामा निःशुल्क स्वास्थ्य परीक्षण तथा परामर्श कार्यक्रम गरिएको हो। कार्यक्रममा करिब एक सय जना बालबालिका, महिला, वृद्धवृद्धा तथा स्थानीय नागरिकले स्वास्थ्य परीक्षण र चिकित्सकीय परामर्श लिएका थिए।
राम मन्दिर व्यवस्थापन समितिका अध्यक्ष एवं स्थानीय समाजसेवी गोकर्ण डाँगीको अध्यक्षतामा भएको कार्यक्रममा दाङका प्रमुख जिल्ला अधिकारी निश्चलराज पाण्डे प्रमुख अतिथि तथा जिल्ला प्रहरी कार्यालय दाङका प्रहरी प्रमुख प्रहरी उपरीक्षक दीपक श्रेष्ठ विशिष्ट अतिथि रहनुभएको थियो।
कार्यक्रमलाई सम्बोधन गर्दै प्रमुख जिल्ला अधिकारी पाण्डेले नागरिक स्वस्थ भए मात्रै समृद्ध र व्यवस्थित नगर निर्माण गर्न सकिने बताउनुभयो। उहाँले स्वास्थ्यलाई विकासको महत्वपूर्ण आधारका रूपमा लिएर स्थानीयस्तरमै विशेषज्ञ स्वास्थ्य सेवा पुर्याउने प्रयास आवश्यक रहेको बताउनुभयो।
“नागरिक स्वस्थ भए मात्रै नगर बनाउन सकिन्छ। विकासका अन्य पूर्वाधारसँगै नागरिकको स्वास्थ्यलाई पनि प्राथमिकतामा राख्नुपर्छ,” पाण्डेले भन्नुभयो।
ग्रामीण तथा आर्थिक रूपमा कमजोर समुदायका नागरिकलाई स्थानीयस्तरमै स्वास्थ्य सेवा उपलब्ध गराउने यस्ता कार्यक्रमले स्वास्थ्य सेवामा पहुँच बढाउनुका साथै सम्भावित स्वास्थ्य समस्या समयमै पहिचान गर्न सहयोग पुग्ने उहाँको भनाइ थियो।
कार्यक्रममा जिल्ला प्रहरी कार्यालय दाङका प्रहरी प्रमुख प्रहरी उपरीक्षक दीपक श्रेष्ठले नागरिकको स्वास्थ्य र सुरक्षालाई परस्पर जोडिएका विषयका रूपमा लिनुपर्ने बताउनुभयो। समुदायसँग प्रत्यक्ष जोडिने यस्ता कार्यक्रमले स्वास्थ्य सचेतना बढाउनुका साथै स्थानीयस्तरमा सहकार्यको वातावरण निर्माण गर्ने उहाँले बताउनुभयो।
नेपाल पत्रकार महासंघ दाङका अध्यक्ष सन्तोष सुवेदीले स्वास्थ्य सेवा नागरिकको आधारभूत आवश्यकतासँग जोडिएको विषय भएकाले स्थानीयस्तरमै विशेषज्ञ सेवा पुर्याउने अभियानलाई निरन्तरता दिनुपर्ने बताउनुभयो। स्वास्थ्य परीक्षणसँगै रोगको रोकथाम, नियमित स्वास्थ्य जाँच र स्वस्थ जीवनशैलीका विषयमा समेत नागरिकलाई सचेत बनाउनुपर्ने उहाँको भनाइ थियो।
सञ्जीवनी टिचिङ हस्पिटलका प्रमुख कार्यकारी अधिकृत दीपक रोकाले अस्पतालले स्वास्थ्य सेवाको पहुँच विस्तारलाई सामाजिक दायित्वका रूपमा लिएको बताउनुभयो। स्थानीय समुदायलाई लक्षित गरी विशेषज्ञ चिकित्सकसहित स्वास्थ्य परीक्षण सेवा उपलब्ध गराउँदा स्वास्थ्य समस्या समयमै पहिचान गर्न सहयोग पुग्ने उहाँले बताउनुभयो।
घोराही बनाऔँ अभियानका संयोजक सबिन प्रियासनले पहिलो चरणमा वडा नम्बर १ सिमलताराबाट सुरु गरिएको स्वास्थ्य परीक्षण अभियानलाई घोराहीका सबै १९ वटै वडामा पुर्याउने बताउनुभयो।
“स्वस्थ नागरिकबिना समृद्ध घोराहीको कल्पना गर्न सकिँदैन। त्यसैले स्वास्थ्यलाई हाम्रो अभियानको महत्वपूर्ण प्राथमिकताका रूपमा लिएका छौँ। पहिलो चरणमा वडा नम्बर १ सिमलताराबाट सुरु भएको यो अभियान घोराहीका १९ वटै वडामा पुर्याउने लक्ष्य छ,” प्रियासनले भन्नुभयो।
उहाँका अनुसार ग्रामीण तथा आर्थिक रूपमा कमजोर समुदायका नागरिकलाई स्वास्थ्य परीक्षणका लागि टाढा जानुपर्ने बाध्यता कम गर्ने उद्देश्यले अभियान सञ्चालन गरिएको हो। स्वास्थ्य परीक्षणलाई एकदिने कार्यक्रमका रूपमा मात्र नभई नागरिकलाई नियमित स्वास्थ्य जाँचप्रति जागरुक बनाउने अभियानका रूपमा अघि बढाउने तयारी गरिएको उहाँले बताउनुभयो।
“घरआँगनमै विशेषज्ञ चिकित्सक पुग्दा नागरिकले आफ्नो स्वास्थ्य अवस्थाबारे जानकारी लिन पाउँछन्। समस्या देखिएमा समयमै उपचार तथा थप परामर्शका लागि सम्बन्धित स्वास्थ्य संस्थासम्म पुग्न पनि सहज हुन्छ,” प्रियासनले भन्नुभयो।
स्वास्थ्य परीक्षण कार्यक्रममा जनरल फिजिसियन, प्रसूति तथा स्त्रीरोग विशेषज्ञ र बालरोग विशेषज्ञसहितका चिकित्सकले स्थानीय नागरिकको स्वास्थ्य परीक्षण तथा आवश्यक परामर्श दिएका थिए। विशेषगरी महिला, बालबालिका, वृद्धवृद्धा तथा विभिन्न स्वास्थ्य समस्या भएका नागरिकले सेवा लिएका थिए।
स्वास्थ्य परीक्षणका क्रममा देखिएका समस्याका आधारमा नागरिकलाई आवश्यक चिकित्सकीय परामर्श दिनुका साथै नियमित स्वास्थ्य परीक्षण, रोगको समयमै पहिचान तथा उपचारका विषयमा समेत जानकारी दिइएको आयोजकले जनाएको छ।
कार्यक्रमको सहजीकरण सञ्जीवनी टिचिङ हस्पिटलका प्रशासकीय अधिकृत सुशील रिजालले गर्नुभएको थियो।
घोराही बनाऔँ अभियान र सञ्जीवनी टिचिङ हस्पिटलले आगामी दिनमा घोराही उपमहानगरपालिकाका बाँकी वडामा पनि विशेषज्ञ चिकित्सकसहित स्वास्थ्य परीक्षण कार्यक्रम सञ्चालन गर्ने तयारी गरेका छन्। स्थानीयस्तरमै विशेषज्ञ सेवा उपलब्ध हुँदा ग्रामीण क्षेत्र तथा आर्थिक रूपमा कमजोर समुदायका नागरिकलाई स्वास्थ्य जाँचका लागि टाढा जानुपर्ने बाध्यता कम हुने अपेक्षा गरिएको छ।
अभियानले नागरिकलाई नियमित स्वास्थ्य परीक्षणप्रति सचेत बनाउँदै स्वास्थ्य समस्याको समयमै पहिचान र उपचारमा पहुँच बढाउन सहयोग पुग्ने आयोजकको विश्वास छ।
