‘त्यहीं हुन्छ नेपाल’ लिएर आए गायक आचार्य (भिडियो सहित)
बाँके । राष्ट्रप्रेम, राष्ट्रिय एकता र नेपाली पहिचानको भावनालाई समेटेर तयार गरिएको गीत ‘त्यहीं हुन्छ नेपाल’ सार्वजनिक भएको छ। गीतमा धनबहादुर ओलीको शब्द रहेको छ भने चर्चित गायक तथा संगीतकार गोविन्द मधुर आचार्यको संगीत तथा स्वर रहेको छ। गीतको म्युजिक भिडियोको निर्देशन साजन कटेलले गरेका हुन्।
देशप्रतिको माया, नेपालीपन र राष्ट्रिय गौरवलाई केन्द्रमा राखेर तयार गरिएको यस गीतले नेपालीहरू जहाँ रहे पनि आफ्नो मातृभूमिप्रतिको प्रेम कहिल्यै नओइलाउने सन्देश दिएको छ। गीतका शब्द, संगीत र दृश्य संयोजनले राष्ट्रप्रेमको भावनालाई प्रभावकारी रूपमा प्रस्तुत गरेका छन्।
सार्वजनिक गरिएको म्युजिक भिडियोमा विभिन्न क्षेत्रका व्यक्तित्वहरूको सहभागिता रहेको छ। गीतको भावअनुसार तयार पारिएका दृश्यहरूले नेपालप्रतिको अपनत्व, एकता र गौरवको अनुभूति गराउने प्रयास गरेका छन्।
गीतबारे आफ्नो धारणा राख्दै गायक तथा संगीतकार गोविन्द मधुर आचार्यले ‘त्यहीं हुन्छ नेपाल’ हरेक नेपालीको भावनासँग जोडिएको सिर्जना भएको बताए।
“नेपाल केवल हाम्रो देश मात्र होइन, हाम्रो पहिचान र गौरव पनि हो। संसारको जुनसुकै कुनामा पुगे पनि नेपालीको मन आफ्नै माटो र देशसँग जोडिएको हुन्छ। यही भावनालाई संगीतमार्फत दर्शक तथा श्रोतामाझ पुर्याउने प्रयास गरेका छौँ,” उनले भने।
आचार्यले राष्ट्रप्रेम झल्काउने सिर्जनाले समाजमा सकारात्मक ऊर्जा र एकताको भावना बलियो बनाउन सहयोग पुग्ने विश्वास व्यक्त गरे। गीत सार्वजनिक भएसँगै सामाजिक सञ्जालमा सकारात्मक प्रतिक्रिया प्राप्त भइरहेको छ।
राष्ट्रप्रेम, नेपालीपन र मातृभूमिप्रतिको सम्मानलाई संगीतमार्फत प्रस्तुत गरिएको ‘त्यहीं हुन्छ नेपाल’ गीतले देशभित्र मात्र नभई विदेशमा रहेका नेपालीहरूको मनसमेत छुने अपेक्षा गरिएको छ।
